Դեկտեմբերի 3-ին սպասվում է «Բարգավաճ Հայաստան» կուսակցության քաղաքական խորհրդի ընդլայնված նիստը:

Այս մասին Armtimes.com-ի հարցին ի պատասխան, թե որքանո՞վ է իրականությանը համապատասխանում մեր տեղեկությունը, որ ԲՀԿ-ն համագումար է հրավիրում, ասաց ԲՀԿ խմբակցության քարտուղար Վահե Էնֆիաջյանը.

«Լինելու են քաղաքական խորհրդի անդամները եւ պատվիրակության ներկայացուցչական կազմը. այն իր բնույթով քաղաքական խորհրդի կազմ է, բայց ավելի ընդլայնված»,-հավելեց նա:

Մեր հարցին՝ սպասվո՞ւմ են ԲՀԿ քաղաքական խորհրդի կազմում փոփոխություններ, Էնֆիաջյանն, ըստ էության, չհերքեց.

«Դե, քաղաքական խորհրդի նիստ է, ըստ էության այն լիազորությունները, որոնք կանոնադրությամբ ընձեռված է քաղաքական խորհրդին, այդ լիազորությունների սահմանում տեղի է ունենալու հիմնականում մեր ներքին գործառույթների հետ կախված հարցերի քննարկումներ»:

Հետաքրքրվեցինք՝ ԲՀԿ նախկին նախագահ Գագիկ Ծառուկյանը հրավիրվա՞ծ է ԲՀԿ քաղխորհրդի նիստին, Էնֆիաջյանը պատասխանեց, որ նման տեղեկություն չունի:

Հիշեցնենք, որ Գագիկ Ծառուկյանը լրագրողների հետ զրույցում չէր բացառել մեծ քաղաքականություն իր հնարավոր վերադարձը՝ ասելով, որ «ծալած էջը հնարավոր է բացել»:

Էնֆիաջյանի խոսքով՝ խորհրդարանական ընտրություններից առաջ ներքին հարցեր կան, որոնք կուսակցությունը պետք է քննարկի:

http://www.armtimes.com/hy/article/97883