Խորհրդարանական ընդդիմությունն ու Ընտրական նոր օրենսգրքի հեղինակներն այսօր առավոտից քննարկումներ են անցկացրել օրենսգրքում փոփոխություններ կատարելու վերաբերյալ: Քննարկել են, այդ թվում՝ ընտրացուցակները հրապարակելու հարցը: Tert.am-ի հետ զրույցում այս մասին ասաց քննարկմանը մասնակից ԱԺ ԲՀԿ խմբակցության ղեկավար Նաիրա Զոհրաբյանը: 

«Քանի որ տեխնիկական պատճառներով, իսկ ես կարծում եմ նաև ձգձգելու պատճառով, «4+4+4» ֆորմատի միջև ձեռքբերված նախորդ համաձայնությունը չգործեց, իսկ խոսքը մատնահետքերի ներդրման, միասնական անձնագրով ընտրություններին քվեարկության մասնակցելու համակարգի ներդրման մասին էր: Բնականաբար, այս պահին, որպես ալտերնատիվ տարբերակ քննարկվում է ընտրական ցուցակների հրապարակումը, բայց դրան կից քրեական օրենսգրքում պատժաչափերի խստացումն այն անձանց նկատմամբ, ովքեր կքվեարկեն այլոց փոխարեն»,- մանրամասնեց Նաիրա Զոհրաբյանը: 

Պատգամավորի խոսքով՝ եթե իշխանությունն ու ընդդիմությունը վերջնական համաձայնության գան, ապա սեպտեմբերի 13-ին մեկնարկելիք Ազգային ժողովի աշնանային նստաշրջանում ԸՕ-ում համապատասխան փոփոխություններ կարվեն: «Կարծես թե մոտ ենք համաձայնության, բայց չեմ ուզում իրադարձություններից առաջ ընկնել, քանի դեռ ջանք գործադրված չէ կյանքի կոչելու համաձայնությունը, որը նախորդ անգամ չեղարկվեց, դարձավ առոչինչ»,- նշեց Զոհրաբյանը: 

Հարցին՝ արդյո՞ք իշխանությունները փոխել են հեռտորաբանությունը ընտրացուցակների հրապարակման տարբերակի վերաբերյալ, նախկինում՝ դեմ էին, մեջբերում էին Վենետիկի հանձնաժողովի բացասական դիրքորոշումն այս հարցում, Նաիրա Զոհրաբյանն այսպես արձագանքեց. «Եթե իշխանության ներկայացուցիչը մասնակցում է պրոցեսին, նշանակում է, որ կողմ են ընտրացուցակների հրապարակմանը»: 

http://www.tert.am/am/news/2016/09/10/naira-zohrabyan/2129757#.V9UyZRnDd...