2014 թվականի բյուջեի կատարողականի քննարկման ժամանակ ԱԺ ԲՀԿ խմբակցության ղեկավար Նաիրա Զոհրաբյանը, դիմելով Էկոնոմիկայի փոխնախարար Էմիլ Տարասյանին, բարձրացրեց գազալցակայաններում տեղի ուենացած դժբախտ դեպքերի հարցը. «Վերջին 10 օրում 2 ողբերգական դեպք գազալցակայանում, Ձեր պատասխանատվությունը տեսնո՞ւմ եք: Վերջին 10 օրում տեղի ունեցած ողբերգական միջադեպերի արդյունքում երկու հոգի մահացան, ուզում եմ Ձեր դիրքորոշումը իմանալ, ինչի՞ արդյունքում է դա եղել և ի՞նչ հետևություններ եք անելու»,-ասաց Զոհրաբյանը՝ հավելելով, որ գիտի՝ խնդիրը կանոնակարգվում է ՏԿԱԻՆ և Էկոնոմիկայի նախարարության համատեղ աշխատանքների արդյունքում:

«Ձեր պատասխանատվությունը տեսնո՞ւմ եք տեղի ունեցածում, ինչի՞ բացթողումների արդյունքում եղավ դա»,-հարցրեց Զոհրաբյանը: Էկոնոմիկայի փոխնախարարը պատասխանեց, որ ԱԳԼՃԿ-ների կանոնակարգման հստակ մեխանիզմ կա, որոնք գործում են Կառավարության ընդունած համապատասխան որոշումներով. «Ունենք որոշման կարգեր, որոնց վերահսկողությունը ՏԿԱԻՆ է սահմանում, միանշանակ ասել, թե ինչն է միջադեպի պատճառը, չեմ կարող ասել, բայց այդ ոլորտում շատ խնդիրներ ունենք, պետք է նայել բոլոր բաց ու թույլ մասերը, որ պետք է այդ մասով ձգենք»,-ասաց Տարասյանը:

Փոխնախարարը նաև հավելեց, որ ԱԳԼՃԿ-ների մասով շատ խիստ նորմեր են գործելու ԵՏՄ շրջանակներում, և 2016 թվականի հունվարի մեկից հետո դրա ազդեցությունը ակնհայտ կլինի: Նաիրա Զոհրաբյանն արձագանքեց, թե ինչո՞ւ է միշտ այդպես լինում, որ «դժբախտ դեպքերից հետո ենք սկսում հետհայացք գցել». «Հիմա էլ պետք է սպասենք հունվարին, որ նոր խստացումները գործեն»,-ասաց նա:

Irakan.info