Նոյեմբերի 16-ին ԲՀԿ նախագահ Գագիկ Ծառուկյանը հանդիպեց «Հայ երիտասարդները Եվրոպայում» ծրագրին մասնակցող երիտասարդներին: Նախաձեռնության նպատակն է բարձրացնել հայ երիտասարդների և ուսանողների՝ միջազգային հասարակական աշխատանքի մասին տեղեկացվածության մակարդակը և խթանել նրանց ակտիվ մասնակցությունը Եվրոպական երիտասարդական ծրագրերին և գործընթացներին:

Ծրագրի ղեկավար Տիգրան Պետրոսյանը նշեց, որ խմբում ընդգրկված են միջազգային ոլորտում փորձ և մեծ հեռանկար ունեցող երիտասարդները, ովքեր ծրագրի շրջանակներում ստացած գիտելիքներն օգտագործելու են ի նպաստ Հայաստանի: «Հայ երիտասարդները Եվրոպայում» ծրագրի շրջանակներում ուսանողները առաջին փուլի ընթացքում ստանալու են տեսական և գործնական գիտելիքներ: Երկրորդ փուլի ընթացքում երիտասարդները ձեռք բերված գիտելիքներն օգտագործելու են Հայաստանում տարբեր ծրագրեր իրականացնելու և Հայաստանի շահերը արտերկրում ներկայացնելու համար: