ՉԻՆԱՍՏԱՆԻ ԿՈՄՈՒՆԻՍՏԱԿԱՆ ԿՈՒՍԱԿՑՈՒԹՅԱՆ ԿԵՆՏՐՈՆԱԿԱՆ ԿՈՄԻՏԵԻ ՈՂՋՈՒՅՆԻ ԽՈՍՔԸ «ԲԱՐԳԱՎԱՃ ՀԱՅԱՍՏԱՆ» ԿՈՒՍԱԿՑՈՒԹՅԱՆ ՉՈՐՐՈՐԴ ՀԱՄԱԳՈՒՄԱՐԻ ՊԱՏՎԻՐԱԿՆԵՐԻՆ

02/12/2009

«Բարգավաճ Հայաստան» կուսակցության 

հարգելի նախագահ Գագիկ Ծառուկյան,

հարգելի պատվիրակներ,

թանկագին բարեկամներ,

«Բարգավաճ Հայաստան» կուսակցության չորրորդ համագումարի հրավիրման առիթով թույլ տվեք Չինաստանի Կոմունիստական Կուսակցության Կենտրոնական Կոմիտեի անունից Ձեր կուսակցությանը հղել ջերմագին շնորհավորանքներ և համագումարի աշխատանքներին մաղթել հաջողություն: 

Չինաստանի և Հայաստանի միջև բարեկամությունն իր արմատներով գնում է դեպի հեռու անցյալ: Վերջին տարիներին չին–հայկական հարաբերությունները հաջողությամբ զարգանում են, անընդհատ խորանում է քաղաքական փոխվստահությունը, աստիճանաբար թափ է հավաքում համագործակցությունը բոլոր բնագավառներում: Բարեկամության և համագործակցության երկկողմ հարաբերությունների հետագա զարգացումը համապատասխանում է մեր պետությունների և ժողովուրդների շահերին:

ՙ«Բարգավաճ Հայաստան» կուսակցությունը կարևոր դեր է խաղում Հայաստանի սոցիալ-քաղաքական կյանքում: Անցյալ տարի նոյեմբերին կուսակցության նախագահ Գագիկ Ծառուկյանը հաջող այց կատարեց Չինաստան, ինչը խորհրդանշում է մեր կուսակցությունների միջև հարաբերությունների պաշտոնական հաստատումը: Չինաստանի Կոմունիստական Կուսակցությունը պատրաստ է «անկախության և ինքնուրույնության, լրիվ հավասարության, փոխադարձ հարգանքի, միմյանց ներքին գործերին չմիջամտության» սկզբունքների հիման վրա շարունակել զարգացնել Ձեր կուսակցության հետ բարեկամական համագործակցությունը, խորացնել Չինաստանի և Հայաստանի ժողովուրդների միջև փոխըմբռնումն ու բարեկամությունը և դրանով իսկ առաջ մղել երկու երկրների միջպետական հարաբերությունների զարգացումը: 

Ձեր կուսակցությանը մաղթում ենք նոր հաջողություններ Հայաստանի հզորացման գործում, ժողովրդի բարեկեցություն և հասարակության առաջընթաց:
Մաղթում ենք բարգավաճում Հայաստանին և երջանկություն նրա ժողովրդին:
 
Ցանկանում ենք մեր երկրների, կուսակցությունների և ժողովուրդների միջև բարեկամության անընդհատ զարգացում:


ՉԻՆԱՍՏԱՆԻ ԿՈՄՈՒՆԻՍՏԱԿԱՆ ԿՈՒՍԱԿՑՈՒԹՅԱՆ 
ԿԵՆՏՐՈՆԱԿԱՆ ԿՈՄԻՏԵԻ ՄԻՋԱԶԳԱՅԻՆ ԲԱԺԻՆ